21- جيش مش عسكر !

بسم الله الرحمن الرحيم ..

الجيش مش عسكر !! ،، السبب إللى خلانى اتكلم عن الموضوع ده إن فى ناس كتير راكبهم جهل عقولهم ويقولك عسكر ، أنا ضد مصطلح عسكر تماماً ..
مع إنى برده ضد تدخلهم فى الحكم السياسى  ،، لكن إللى ضحى بولاده فى 73 وإللى بيضحى بولاده على طوول حالياً فى سيناء وكل حتة فى مصر !
يتهانوا ، يتهانوا ليه ,, أصل بلادنا بتكافئ الخونة بس لكن إللى سف ترابها وبيموت كل يوم على الحدود ومحدش بيسأل فيه بيكون جزاءه إن يتقال عليه عسكر !!
عسكر إيه بس روح اعرف يعنى ايه مصطلح عسكر الأول !!
أحب أقول إنى كمان لسه مشتومة من شوية من حد من الإخوان بتقولى : يا لحاسين البيادة ، يا عبيد العسكر !
الحقيقة أنا مش بتكلم مع أى حد فى مناقشة عقيمة وغير هادفة علشان كده مردتش عليها ..
لكن فى قرارة نفسى هقولها : أنتوا بآه لحاسين الكرسى وعبيد المرشد !!
السياسة لعبة حلوة بآه وطالما الصراع بآه على مصر إحنا نضحى بروحنا علشان جندى من جنود الجيش جااى من الصعيد وسايب بلده وأهله ،، ولا إللى كان رايح يتجوز قتلوه كلاب حماس ولحاسين الكرسى !!
أنا صحيح ضد إن مصر تكون عسكرية ،، مصر هتفضل مدنية !!
لكن مش معنى ده إنى أقبل بإهانة جيش بلدى .. ويستمر الصراع بينى وبين ناطقى كلمة "عسكر"
وبجد أنا إنبهرت من الفنانين إللى عملوا الأغنية دى حلوة أوى 
تسلم الأيادى - بعض فنانين مصر ♥ =))

20- حتى لو إخوان ميموتوش !!

بسم الله ..

اللهم قنا شر الفتن ماظهر منها وما بطن ، وانتقم من قاتلى الأبرار ،،

مش معنى إنها إخوان تموت  .. لا لا لا ،، مصر مش كده ولا عمرها هتكون  ،، ومش معنى كده إن الجيش هو إللى قتلها

وإللى رايح وإللى جاى يدعى على السيسى .. لا لا لا

أنت مشوفتش بعنيك حاجة ،، أنت مشوفتش السيسى جاى يموتها ،، متقولش هو بعت ناس " فكر تترحم عليها وتقبض على إللى حرمها من الحياة بدل ما تلاقى شماعة تعلق عليها مبرراتك !!

أحسن كلمة تتقال "الله يرحمها"

افتكرك أوى لما كنت فى جنازة جهاد وكنت ماشية مع صحباتها وقد إيه كانت روحها حاضرة معانا ! ♥

افتكرت لما نزلت مسيرة بتطالب بحقها .. وافتكرت الدكتورة إللى حرمتها من الحياة علشان نفوذها

افتكرت العميد إللى كان بيكتم على الموضوع وبيحاول يهدد أهلها 

افتكرت لما روحت البيت عند مامتها وقد إيه كانت مؤمنة وصابرة

لا لا لا لا يارب .. مش علشان إخوان تموت ،، أنا أدافع عن أى مصرى بروحى وبعمرى كله ولا إن يموت حد تانى

كفااااااااااااااااية !!

كفاية يارب دم .. أى حاجة إلا الموت ،، ده صعب أوى بيوجع القلب أكتر حاجة مؤلمة فى الوجود !

نقد تانى : ليه كل إللى يموت نقول عليه شهيد افتكر حد كان بيقتل حد واتقتل ده يبقى شهيد .. طيب حد كان بيتحرش بواحدة فى الميدان وظابط جدع قتله يبقى شهيد !!

بعدنا عن الدين وعن ربنا خلانا نفهم الشهادة غلط ... لا لا يا ناس 

الشهادة : إنك تموت وأنت بتدافع عن حقك ، عن بلدك ، عن عرضك ،  !!

ضد مين بآه مش ضد ابن بلدك ، مش ضد أخوك ،، ضد العدو ، ضد المعتدى ، سئ الغرض ..

ربنا ينتقم من إللى بيخلص على شبابنا !!

يا إللى بتتخانقوا علشان الكرسى !

مصر مش إخوانية ولا فلولية ..

مصر حرة ثورية =")) 

19- آخر الرجال المحترمين

بسم الله الرحمن الرحيم ..

أحب أتكلم إنهاردة عن الشهامة .. الجدعنة .. الرجولة

إللى هى أصلاً موجودة فى دم المصريين .. حتى إللى الدنيا ألهته

ومكانش بيظهر من شهامته كتير لكن هو من جواه إنسان نبيل وشهم ومحترم ..

بيحافظ على إخواته البنات .. بيحترمهم .. بيدافع عنهم .، 

مش بس علشان هو إتربى على كده لا علشان كمان هو إنسان شهم .. :")

موقف (1)

لما تكون ماشى فى شارع كده عندنا اسمه كلية آداب فى موسم إمتحانات الثانوية

وبعدين ماشى بكل هدوء وعلى إيدك الشمال شلة بناتيت حلوين واقفين جمب الرصيف

وبعدين إذ فجأة بنت منهم وقعت وأغمى عليها وزمايلها كلهم مسكوها وبيفوقوا فيها مفيش فايدة

وفى أجزخانة على الرصيف التانى !!

طب هنوديها إزاى وفجأة واحد والله مش عارفة هو زميلها ولا عمره ماشافها ولا حتى يعرفها .. راح جاى شايلها قدامنا

وموصلها الأجزخانة على الرصيف التانى وفى وسط العربيات وهو بيجرى ♥ :")

موقف (2)

لما طالع الأسانسير وتلاقى واحد طالع برده وبعدين لما يلاقيكى طالعة فى نفس الأسانسير يقولك :

 طب اتفضلى وأنا هطلع لما توصلى أنتى  

موقف (3) 

لما تكونى ماشية فى الشارع زحمة أوى وتيجى تعدى من جمب واحد ،،

يروح حاطط إيده ورا ظهره علشان ميخبطش فيكِ  ♥

موقف (4)

لما تكونى ماشية فى الشارع وطالعة من درس وبعدين تقع الكتب منك وتلاقى حد متعرفيوش بيلم الكتب معاكى :")

وبعد ما يخلص وتآخدى الكتب يقولك خدى بالك =))

موقف (5)

لما تكونى ماشية مع أصحابك وفى حد شوارعى ماشى وراكم وتقولى لأى حد من الشارع حتى لو دخلتى محل بقالة وقولتى للراجل صاحبه يطلع بالطوبة ويقوله متمشيش ورا البنات دوول تانى أحسنلك =))

موقف (6)

لما تبقى رايحة تزورى زميلتك وتوهتى مش عارفة توصلى وتلاقى حد تسأليه مش هيمشى إلا لما يوصلك للمكان إللى أنتى عايزاه 

ويقولك أنا تحت أمر حضرتك  =))

موقف (7)

لما تكونى بتعدى الشارع وفى عربية جاية ويروح واقفلك ويقولك إتفضلى :")

موقف (8)

لما واحدة تقع فى الشارع وتلاقى حد متعرفهوش بيمدلها إيده علشان تمسك فى كمه وتقوم :")

18- نساء صنعن التاريخ

بسم الله

أحب أن أبدأ موضوعى عن نماذج حالية فى دولتنا لم يسمع بها الكثير ولكنها واجهة مشرفة لمصر فى العالم ولكنها مغمورة بسبب إندماج الكثير فى الحياة السياسية وترك المواضيع الهامة كـ هذة ،، 

يجب أن يأخذوا حقهم =))

1-  البشمهندسة : داليا السعدنى

هى فتاة مصرية حصلت على كلية الهندسة ،، اقتحمت مجال المقاولات فى مصر وإيطاليا 

وحصلت على الجائزة الإيطالية " ديزين آوارد " 

عرفت بتفوقها فى سنوات دراستها وهى مميزة عالمياً .. تحمل اسم مصر 

2-  آلاء عبد الجواد 

  آلاء أصغر مخترعة مصرية، حيث اخترعت جهازا لتخدير الحيوانات، وجهازا لمعالجة مضاعفات مرض أنيميا البحر المتوسط، وكلاهما مسجل كبراءة اختراع بمكتب براءات الاختراع المصرى بأكاديمية البحث العلمى للعلوم والتكنولوجيا .

3-  نورهان " صاحبة اختراع السيارة الهوائية " 

  عندما بدأت الصغيرة نورهان أولى خطواتها الدراسية، حلمت أن تكون عالمة نووية، مثل سميرة موسى، وتلتحق بقسم الهندسة النووية بكلية الهندسة ، وفى منتصف طريق دراستها علمت بإلغاء القسم، فحولت أفكارها النووية السلمية، إلى أفكار أخرى تخدم المجتمع فى مجال الجاذبية، والاحتباس الحرارى ، وعلاج لمرض الزهايمر . 

4-  عزة إبراهيم  

  عزة إبراهيم طالبة مصرية في المرحلة الثانوية تبلغ من العمر 17 عاماً لكنها ليست كغيرها من الطلاب فشغفها بالعلوم لفت أنظار الجميع إليها خاصة بعد فكرتها الجديدة الخاصة بتحويل البلاستيك إلى وقود ، بدأت «عزة» رحلتها بحسب تقرير «سي إن إن» في ورشة صاخبة بحي الزبالين في العاصمة ، المصرية القاهرة حيث يقوم العمال بطحن البلاستيك المستخدم وصهره في قوالب ، تقطع إلى حبيبات صغيرة وتكمن فكرة «عزة» في تحويل هذه الحبيبات إلى وقود إلا أنها لم تستطع تنفيذ فكرتها بمفردها .

5-  السيدة : ليلى عبد المنعم  

  حصلت المخترعة ليلى عبدالمنعم على وسام الاستحقاق من مؤتمر جلوبل في لندن بعد توصلها لأكثر من 100 اختراع ومع هذا لم تحصل المهندسة ليلى على شهادة براءة اختراع عربية رصيدها من الاختراعات تخطى 100 اختراع .. مجالات اختراعاتها متعددة ومختلفة .. فاستحقت المهندسة المصرية (( ليلى عبدالمنعم )) أن تكون أول امرأة عربية تحصل على وسام الاستحقاق من مؤتمر جلوبل الذي يعقد سنويا في العاصمة البريطانية لندن في مجال الاختراعات الحديثة .. بل وجاء ترتيب المهندسة الملقبة بأم المخترعين الثالث بين كل المشاركين في المؤتمر .. لكن رغم أنها وصلت الى العدد ( 101) من الاختراعات فإن أكاديمية البحث العلمي في مصر لم تقدم لها براءة اختراع واحدة رغم مرور أكثر من عشر سنوات على أغلب اختراعاتها !! 

6 -  الدكتورة : زينب شعبان أبو النجا 

عالمة وسيدة الكيمياء الأولى بالعالم ، فازت بلقب سيدة الكيمياء فى العالم 2011  ، ولا يسمع عنها معظم المصريين رغم أنها قد قدمت كثير من الأبحاث التى أذهلت العالم كله ، دى من نوابغ جامعة المنصورة ، وهى أستاذ فى كلية العلوم بجامعة المنصورة .

7-  عائشة مصطفى  

المراهقة المصرية عائشة مصطفى (19 عاماً) التي اخترعت نظاماً خاصاً بقوة الدفع للمركبات الفضائية المستقبلية، دون الحاجة لاستخدام قطرة واحدة من الوقود. اختراع أذهل العالم كله وأصبح محور حديث علماء الفضاء في كل مكان ، ووفقاً لموقع "إنهابيتات" الأميركي، يساعد الاختراع الجديد على التخلص من صواريخ الدفع التقليدية، والاعتماد على توليد الطاقة باستخدام جهاز من الأسطح والأشياء في الفراغ عن طريق قوة دفع "كازميير – بولد " التي لها تأثيرات في حجب كمية من الطاقة والاحتفاظ بها .

8-   الطفلة " سلمى شريف وجيه "

حصلت الطفلة المصرية سلمي شريف وجيه والبالغة من العمر 12 عاما علي المركز الاول في المسابقة العالمية للرياضيات الذهنية التي اقيمت بالعاصمة الماليزية كوالالمبور برعاية المجموعة الدولية للذكاء والتعليم حيث فازت بلقب اذكي طفل في العالم من بين 3000 طفل مشارك من جميع انحاء العالم كما حصلت الطفلة روءي هاني علي المركز الثالث وليلي احمد بدر الدين علي المركز السادس ، والجدير بالذكر ان الاطفال المصريين حصلوا علي اربعة مراكز اخري من الحادي عشر حتي المركز الاربعين ليثبت الطفل المصري انه الاذكي علي مستوي العالم .

9-  رتيبة الحنفى

رتيبة الحفني فنانة مصرية ، مغنية أوبرا عالمية، وعميدة معهد الموسيقى العربية في القاهرة ، كما أنها أول امرأة تتولى منصب مدير دار الأوبرا المصرية بالقاهرة ، حصلت على "جائزة الدولة التقديرية في الفنون" من المجلس الأعلى للثقافة المصرى ، رشحها جمال عبد الناصر لبطولة «الأرملة الطروب» والقصبجي أستاذها الأول/ جريدة النهار الكويتية ، معيدة بالمعهد العالى لمعلمات الموسيقى ، رئيسة لدار الأوبرا المصرية ، رئيسة المجمع العربى للموسيقى التابع لجامعة الدول العربية .

10-  فاطمة موسى

أكاديمية ومترجمة مصرية أحد أبرز الأكاديميين ونقاد الأدب في مصر والعالم العربي ، حصلت فاطمة موسى على درجة الليسانس في اللغة الإنجليزية وآدابها من الدرجة الأولى مع مرتبة الشرف ، تزلت العديد من المناصب الهامة ، جائزة الدولة التقديرية فى الأدب ، تكريم الجمعية الدولية للمترجمين والأدباء العرب .

11-  عائشة راتب 

باحثة حقوقية وناشطة وسياسية مصرية، وزيرة التأمينات والشؤون الاجتماعية (1974–1977) وسفيرة مصر في الدنمارك ثم ألمانيا الغربية ، وكانت أول امرأة تعيَّن في هذا المنصب. تخرجت من كلية الحقوق بحامعة القاهرة في سنة 1949، وعينت معيدة في الجامعة وحصلت على شهادة الدكتوراه في الحقوق في سنة 1955، ثم تدرجت في الوظائف حتى مرتبة الأستاذ وترأست قسم القانون العام ، جائزة الدولة التقديرية في العلوم الاجتماعية من المجلس الأعلى للثقافة .

12- عائشة عبد الرحمن

هي مفكرة وكاتبة مصرية، وأستاذة جامعية وباحثة، وهي أول امرأة تحاضر بالأزهر الشريف، ومن اوليات من اشتغلن بالصحافة في مصر وبالخصوص في جريدة الأهرام، وهي أول امرأة عربية تنال جائزة الملك فيصل في الاداب والدراسات الإسلامية .

13-  إنعام محمد على

هي مخرجة مصرية ، أنتجت العديد من الأفلام والمسلسلات، تحصلت على ليسانس الآداب من جامعة عين شمس في القاهرة ، وكذلك على الماجستير من كلية الإعلام في جامعة القاهرة ، وحصلت على جوائز مصرية وعالمية كثية على أعمالها وفنها الهادف .

14-  سهير القلماوى

كانت البنت الوحيدة بين 14 زميل من الشباب في قسم اللغة العربية بكلية الآداب وكانت تتفوق عليهم

بدأت تكتب في مجلات (الرسالة)، و(الثقافة)، و(أبولو) وهي في السنة الثالثة من دراستها الجامعية، وحصلت على ليسانس قسم اللغة العربية واللغات الشرقية عام 1933. تُعد سهير القلماوي هي أول فتاة مصرية تحصل على الماجستير عن رسالة موضوعها (أدب الخوارج في العصر الأموي) عام 1937، كما حصلت على الدكتوراه في الأدب عام 1941 عن (ألف ليلة وليلة) ، حصلت سهير القلماوي على جائزة الدولة التقديرية .

15-  لطيفة الزيات

أستاذة الأدب الإنجليزي بكلية البنات جامعة عين شمس سابقاً، حائزة على جائزة الدولة التقديرية للأدب عام ١٩٩٦، كانت رمزاً من رموز الثقافة الوطنية والعربية وإحدى رائدات العمل النسائي في مصر، لها سجل حافل بالريادة في جميع المجالات التي خاضتها والعديد من الأعمال الأدبية ،

 حصلت على الكثير من الجوائز المصرية والعربية عن أعمالها  !!

أحب أديلهم جزء بسيط من حقهم علينا وعلى الدولة بذكر أسمائهم فى حاجة زى دى ويا رب أكون حاجة مشرفة زيهم إن شاء الله =)) ♥

17- الجهل لا دين له !

بسم الله الرحمن الرحيم ..

أنا هسأل سؤال كده مبدئياً .. هو يعنى ايه جهل ؟!

وأحب أجاوب أنا برده .. الجهل يعنى إنك تكون مش جاهل التعليم بس لا .. ممكن تبقى

جاهل زوق ، جاهل أدب وأخلاق ، جاهل الإحترام "مجرد من الإحترام"

يعنى الجهل مش مفهوم علمى بس ومن خلال السياق ده أحب أحكى موقف حصل معايا !!

كنت راكبة التاكسى مع ماما وبعدين لاقين سواق التاكسى جمبيه واحدة تقريباً بنته أو أخته الصغيرة 

وبعدين هو إدالها التليفون بتاعه وقالها إتصلى بـسعاد ،،

هى اتحرجت علشان أنا كنت باصة عليهم الحقيقة وبعدين أخدت منه الموبايل وحاولت تتصل لكن أنا كنت ملاحظة إنها 

مش عارفة تتعامل مع التليفون التاتش بتاعه رغم إن اللانجوتش كانت بالعربى !!!

أنا إستغربت جداً وبصراحة كنت هموت وأقولها ممكن أساعدك .. بس تفاجأت بمفاجأة صاعقة !!

بيقولها إضغطى على الشين أم تلات نقط وبعديها الياء إللى شبه البطة ..

أصابتنى الصاعقة .. البنت جاهلة علمياً

يعنى مبتعرفش تقرأ ولا تكتب .. بصراحة أنا مكنتش مصدقة الإعلاميين إللى بيقولوا إن تقريباً 50%

من شعب مصر جهلة وغير متعلمين .. !!!

قد إيه حزنت على البنت دى وعلى بلدها ومستقبلها دى ممكن أى حد يلبسها مصيبة لمجرد إنها 

مش بتعرف تقرأ ولا تكتب .. ،،

بصراحة البنت اتكسفت منى جداً وراحت مرجعة التليفون للسواق قريبها .. مع إنها كانت كبيرة حوالى 17 سنة مثلاً

ممكن تكون البنت دى ظروفها مساعدتهاش إنها تتعلم .. لكن

أنا مؤمنة جداً بالعزيمة والإرادة إللى خلت الثالث على الجمهورية فى نتيجة الثانوية العامة أبوه بواب فى يوم من الأيام

بجد كان نفسى مصر كلها تبقى متعلمة ونقضى على الجهل ده لأن الجهل ده أشد خطراً من الأسلحة النووية والأمراض المميتة

بجد المجتمع الجاهل ده بيموت بالبطئ .. مع إن ولاده بيحبوه لكن مش هيعرفوا يعملوله حاجة علشان هما جهلة !!

لكن أرجع وأقول لو كل واحد حكم عقله وضميره هنكون أفضل أمة عرفتها البشرية زى ما قال عننا الرسول - ص -

 

16- عن الورد والقهوة والشيكولاته ♥

بسم الله ..

مين فينا مبيحبش الورد !!؟ ،، طيب مين فينا مبيحبش القهوة ؟! ،، طيب مين فينا مبيحبش الشيكولاته !!

أحب أأكد لكم وبعد مباحثات ودراسات وإحصائيات إن مفيش بنت فى العالم مش بتحب الحاجات دى ،،

دى فى الحقيقة حاجات حلوة أوى بالنسبة لى خصوصاً لما نكون فى رمضان والبيبسى والشيكولاته
موجودين فى التلاجة .. " يا ربى " بتعذب !! :D

بجد أحب أقولكم أحسن يوم فى حياتى اليوم إللى يجتمع فيه الشيكولاته مع البيبسى مع القهوة 

وكمان تكمل ببوكيه ورد أشتريه ليا بـ 30 جنيه من عند عمو أشرف :D

عايزة أقولكوا تآكلوا كل حاجة وتشربوا كل حاجة لكن مش كل يوم يعنى :D

الحاجات دى بفلووس برده وبعدين بتخلص بسرعة كمان =))

بس خليكوا فاكرين إن فى ناس كتير فى مصر بتنام جعانة علشان مش قادرة تجيب أكل ..

وناس كتير بتبات سقعانة وحرانة علشان معندهمش بطانية ولا دفاية ولا تكييف ..

كل ما تيجى تسرف فى إنفاق الفلوس : افتكرهم .. 

تقوم تحس بالنعمة إللى أنت فيها 

احمد ربنا .. وخليك على طوول مبتسم ومتنساش الناس الغلابة =))

15- يا أم المريلة كحلى ♥

 

 

بسم الله

 

 

مبدأياً كده أحب أقول إننا مقبلين على أيام زى الفل والحمد لله قدمنا فى المدرسة الثانوى ،،

لا وإيه دايرين حجز على مدرسين ثانوى ،، بصراحة حاجة مش لطيفة خالص ،، خصوصاً

إن المدرسين بتوع ثانوى بقوا بياخدوا فلوس كتير ،، ,, أنا بصراحة بحسد :D

خصوصاً إن المواد زادت شوية يعنى هنتعب شوية أكتر فى المذاكرة إن شاء الله

لا وهنروح المدرسة كل يوم مش زى السنة الفلة إللى فاتت ..

لا وهنبتدى بآه كشاكيل وأدوات المدرسة وشنطة جديدة ولبس المدرسة كمان !!

بصراحة بتكون أيام زى الفل والحمد لله ..

 

بس أكتر حاجة محيرانى إنى مش عارفة ألبس مريلة ولا جيب .. :D ^_^

وكمان أكتر حاجة حبيتها إنى بقييت بسمع منير كتير ..
#منير - يابت يا أم المريلة كحلى =))

وكمان هكون مع أصحابى إللى بحبهم إن شاء الله 

 

لا واليومين دول مقضينها خروج فى رمضان وإحنا صايمين عادى ،،

ده طبعاً خوفاً من إن الأجازة تخلص ونتعذب أكتر من كده :D

بس والله أنا متفائلة .. أنا بعترف إنى مجتهدتش أوى السنة إللى فاتت لكن إن شاء الله هيبقى عندى ضمير
السنة دى إن شاء الله =))

كل واحد لازم يزرع قلبه أمل وإيمان ♥ -_-

14- الناجح يرفع إيده =))

بسم الله ..



طبعاً زى ما أنتوا عارفين إنهاردة كان يوم لطيف وظريف ،، "نتيجة الثانوية العامة 2013 "
طبعاً شفتهم زى كل سنة ،، بس أنا بجد تفاءلت منهم ،، هما اجتهدوا وتعبوا وربنا ادالهم على آد تعبهم ..

بس أنا أحب أقول أن الثانوية العامة مش نهاية المطاف : يعنى أنت ممكن متدخلش كلية طب لكن ممكن تدخل كلية صيدلة وتبقى أكبر صيدلى وكيميائى فى مصر ،، وصحيح ممكن متدخلش هندسة لكن تدخل كلية علوم وتكون حاجة كويسة 
لبلدك وأهلك ،، كمان ممكن تبقى جايب 99% وتكون حابب تدخل كلية سياسة وإقتصاد زى الأنسة \ إسراء
التانى على الثانوية العامة ،، عادى جداً

يعنى أنت إللى تحدد مصيرك وأنت إللى تقرر مستقبلك هيكون شكله إزاى من خلال ميولك وقدراتك ،،
مش علشان أبوك مثلاً حابب إنك تطلع دكتور يبقى تحقق له رغباته وتدخل حاجة إنت عارف إنك مش هتكون متميز فيها 
لازم تكون عندك الإرداة والعزيمة والأمل إللى يخلوك ترسم مستقبلك ،،

عايزة أقول كمان إن عمر ما فى مدرس شاطر ومدرس خايب .. مستحيل جداً
أنت إللى بإيديك تحدد مستواك مع أى حد حتى لو مش بتاخد دروس خاالص ،، الإيمان والعزيمة إللى جواك هما إللى هيدفعوك ويزرعوا الأمل جواك 

كمان حابة أقول لأى حد نتيجته مش لطيفة إنه ميزعلش الثانوية العامة مش آخر المطاف ،، وربنا كاتبلك كده عيش اليوم
وافرح بمجهود سنتين من عمرك وخلى عندك إيمان بقدراتك وإنك ممكن تحقق أكبر من كده بكتير ..

لازم يبقى عندك هدف وتخلى لحياتك معنى وتآخد ليها قدوة حسنة تقتدى بيها فى حياتك :))
 
أحب أقول كمان لبتوع الثانوية العامة أنتوا خلصتوا ، شوفوا بأه مستقبلكم والكلية والشغل والحياة الحلوة دى
أنتوا خلصتوا وإحنا هيجى علينا الدوور كمان سنتين ولا حاجة إن شاء الله ..
مبروك ليكوا كلكوا والأوائل كمان ..
ومبروك لكل قرايبى وجيرانى وأصحابى الكبار .. افرحوا بمجهودكم ،، وياريت متنسوش تدعولنا :
" أنتم السابقون ونحن اللاحقون " :D :D :D
ختاماً بآه أحب أهديلكوا كلكوا
 الأغنية الجامدة دى .. ♥ عبد الحليم - الناجح يرفع إيده ♥ =))

13- صور مرفوضة

بسم الله ..


 طبعاً زى ما إحنا عارفين إن الشتيمة أو الألفاظ النابية زادت أوى فى الأيام إللى فاتت ،، لدرجة إنك حتى لو نزلت تتمشى فى الشارع لازم تسمع شوية ألفاظ حلوة تخرم ودانك !!
يعنى مثلاً مجرد إنك تمشى فى الشارع تلاقى عجلة خبطت عربية ينزل صاحب العربية .. يبدأ يتكلم لصاحب العجلة :
أنت يابن ال**** أنت إتعميت .. إنت سرحان بروح أمك كنت هتكسرلى الفانوس !!!
طيب إزاى ياعم الحاج بالعجلة ويكسرلك الفانوس .. الله أعلم  ..

أو ممكن مثلاً تلاقى العيال الصغيرة فى الشارع بيشتموا بعض كمان واحد يقول للتانى يلعن **** ده أنا ه**** 
ولو راجل كبير قرر يتدخل تلاقى أعلى صوت بيقول : خليك فى حالك يا حاج أنا مش عايز أكلمك علشان أنت راجل كبير !!
ده على أساس إنك كده مكلمتهوش يعنى !!
أوتلاقى مثلاً واحد بيكلم صاحبه وبيقوله *** متخلنيش أسمعك حاجة متعجبكش " طبعاً أنتوا عارفين إيه هى الحاجة دى "
 
طيب نشوف مثلاً موقف تانى ..
أنت مثلاً ماشى فى الشارع آآهو تلاقى واحد جاى جرى يسلم على واحد تانى ويقوله :
أنت فين يابن ال****** يا *** يابن ال*** وحشتنى يااض !!!
ممكن يجيلك شلل من الصدمة طيب إزاى هو بيشتم الراجل صاحبه .. لا وصاحبه متقبل !

أو مثلاً واحدة ست إتخانقت مع واحدة تانية لسبب تافه مثلاً إنها رشت ميه قدام بيت التانية تلاقى الست خارجة بربطة دماغها
وتنزل تقولها يا ****** إنزليلى هنا ده أنا هطلع ****** ده أنا هوريك يا شوارعية !!
لا وآخر التطورات بآآه شتايم الإشارة إللى هى منتشرة بطريقة غريبة  ،، تلاقى مثلاً واحد بيعمل باى باى لواحد تانى بس بطريقة مختلفة " أكيد فاهمنى يعنى " !!

أو مثلاً تلاقى الخناقات الحديثة والمتطورة دلوقتى بقت بالساطور والسكاكين وأحياناً بالخرطوش والرصاص الحى 
لسبب تافه إن مثلاً واحد زق واحد بيهزر معاه !!
وممكن ووارد جداً إن أى حد يموت وملهوش ذنب


لا والأحدث بآه شتايم البنات اليومين دوول تلاقى البنت شكلها محترم جداً وبعدين تكلم صاحبتها وفجأة تلاقيها بتقول :
fu**  أنتِ يا حاجة عارفة أصلاً دى مش معناها تباً لكِ ولا أنت ماشية ورا ترجمة الأفلام !!
شتايم أجنبى علشان الناس متفهمش هى بتقول أيه ولا علشان متشتمش عربى فيعرفوا إنها قليلة الأدب مثلاً ..

أو مثلاً إن حد عارف اسم أمك ده فى حد ذاته إهانة كبيرة ويقول مثلاً خد يابن فردوس !!
كمان ..

إنتوا عارفين طبعاً إن التيت دى من عندنا يعنى خايفين عليكم من الخضة لما تسمعوا شتايم زى دى أنا مش هعمل نفسى كلاس ومعرفش الحاجت دى لا لا لا .. الحاجات دى موجودة فى المجتمع ومفروض إحنا فعلاً نتكسف من نفسنا لمجرد إننا مش عارفين نعالج الموضوع ده !!
عايزة كمان أقول بالرغم من إننا شعب متدين بطبيعته إلا إننا أكبر دوول العالم فى معدلات سب الدين !!!
يعنى أسب ملتك إللى هى نفس دينى لمجرد إختلافى معاك ..
طبعاً الشتايم دى ممكن متبقاش ليك لوحدك دى ممكن تمس أبوك ،، أمك ،، أختك ،، عمتك ،، جدك ،، أو أجدادك كلهم ،، أو ناس ماتت من زمان ملهومش أى ذنب لمجرد إنك عملت حاجة معجبتش حد !!

ختاماً كده عايز أقول إننا لازم نتغير بجد فى سلوكياتنا وفى حياتنا إزاى عايزين البلد تبقى كويسة وإحنا لسة بنشتم بعض بأنبى الألفاظ   ،،  " إن الله لا يغير ما بقومِ حتى يغيروا ما بأنفسهم "

بجد إللى دفعنى أتكلم فى الموضوع ده أنا عايزة إننا نتغير بجد !!
ابدأ بنفسك .. حاول .. علشان بلدك .. ربنا حرم السب واللعن للأشخاص فما بالك بالدين !!

بجد إللى دفعنى أتكلم فى الموضوع ده أنا عايزة إننا نتغير بجد !!
ابدأ بنفسك .. حاول .. علشان بلدك .. علشان ربنا يسامحك ..
ملخصاً اسمعوا الحلقة دى 
ماعلينا - باسم يوسف

12- روحانيات العيد

بسم الله ..


كثير فى حياتنا من الروحانيات المقدسة التى اعتدنا عليها فى السنة زى مثلاً :
العيد .. ♥
العيد يمثل لنا أفضل يوم فى العام يتمتع بكثير من الروحانيات الهامة إبتداءً من آخر أيام شهر رمضان والذهاب لشراء ملابس العيد ،، التى هى من ما هو مقدس ،، وبسكويت وحلويات العيد التى أذهب عادةً برفقة العائلة لشرائها كل عام 
و تنظيف البيت الذى هو عادةً ما يكون قبل العيد بيومين على الأقل ،، و بلونة العيد ، 

إلى التمر الذى نقوم بتوزيعه على الناس ،، وصلاة العيد التى هى من مقدسات العيد ،، وخروجة الأصحاب تانى أيام العيد 
والمتنزهات والملاهى والمصاصات وغزل البنات والعجل فى أول يوم مع عزومة عائلية يتجمع فيها الجد والجدة وكل الأبناء والأحفاد والأقارب والجيران ،،
 إلى طبق الحلويات الذى يدور على سكان البيت فى العيد ،، إلى السينما و أفلام العيد ..


إلى عيد شم النسيم ( عيد الربيع ) :
عيد الزهور والفسيخ .. !
الذى هو أكثر العادات المقدسة التى ورثناها عن أجدادنا الفراعنة .. فى الحديقة ،، نجلس لنأكل ( الفسيخ والرنجة والسردين )
وكل أنواع المملحات ،، مع البصل الذى يعمل كـ مطهر لكل ذلك :D


نحن شعب بالطبيعة مبتهج وسعيد رغم الظروف والشقاء يحب الحياة ويقدس الروحانيات  .. 



أحب أختم بالأبيات دى :
#شعر 



 

أقبل العيد مستفيض الجلال مستنير الشروق والآصال

أصبحت من صباحه الناس في بشـ ـر وأمستْ من ليله في اختيال

التهاني على الشفاه تراجيـ ـع تغنّت بفرحة الإقبال

والأماني بين الجوانح خفق دائب بالرجاء والابتهال

العيد لبس الثوب بين نضارة تختال فيه بزهوة وجماح

أو رفع أعناق الرجال ومشيها في بزَّة تزهو مع الأطماح

لكن عوناً للضعيف ومنحة وسداد رأي في هوى وصلاح

العيد أن تعطي الجميل وترتضي سبل السلام وسيلة الأفلاح

أطلَّ العيد في ثوب جميل يطوف على الروابي والسهول

وجاء الحب يغمر كل قلب يبدِّد قسوة الهجر الطويل

11- براءة طفل

بسم الله


أكيد براءة الأطفال حاجة جميلة فى الحياة وممكن تكون هى السر فى حبهم ومن خلال السياق ده أحب أحكى القصة ..

ابن خالتى كان فى أولى إبتدائى جه بيقولى : أنتِ عارفة أنا صاحبى مريض 

قلتله : ربنا يشفيه يا عمر عنده إيه  ؟

قالى : عنده على عينة أزرق 

قلتله : يعنى مياه زرقاء دى ولا إيه ؟

قالى : لا شيفه عنينا مش فيها حتة أسود هو الحتة دى بقى عنده زى السماء و البحر ..

قلتله : يا حبيبى كده هو مش مريض كده هو عنية ملونة 

قالى : أيوه هو بقى بيشوف كل حاجة زرقاء

قلتله : لا يا عمر هو بيشوف عادى زينا ..

قالى : هو صاحبك ولا صاحبى أنا  ،،.أنا عارف أنا بقول إيه هو مريض
بقول لخالتى إيه موضوع الولد إللى بيشوف أزرق ده .

قالتىى : ده قاعد جمبه فى الفصل و عمر مقتنع إن الولد بيشوف كل حاجة زرقاء و كل شوية يفضل يقولة إنت شايفنى أزرق ؟؟ 

لحد ما مامة الولد جت نقلته من الدسك بقى عمر يروحله فى الفسحة و فى المرواح يقوله أنت شايفنى أزرق ؟

راحت مامته نقلته من الفصل
فــ جت أختى تلبس العدسات الزرقاء بتاعتها راح جاى قالى : هى منة جالها نفس المرض .. ؟

فـمنة قالتله : لا يا عمر أنا لابسة عدسات زرقاء تعالى أوريك أول ما أشيلها هترجع عينى عادى .. ؟

شافها بتشيلها و فضل يصوت و يقول بتشيل عنيها من مكنها ..!!

راح للولد تانى يوم الفصل وقاله متزعلش إنك بتشوف كل حاجة أزرق .. أنا قريبتى بتشيل عنيها من مكانها .. !!!

(إتعمله إستدعاء ولى أمر علشان بيزعج الطلبة و بيخوفهم ) :D

10- رحمة فى قلب طفل شوارع

بسم الله 

ساعات بنشوف مناظر كتير مش كويسة فى الشارع منها مثلاً أطفال الشوارع ،، فى ناس تشوفهم وتقول ييع ،، 

فى ناس تشتمهم ،، فى ناس تضربهم ،، فى ناس تخبطهم بالعربية .

أحب أقول بأعلى صووت : أطفال الشوارع مسئولية مجتمع ، مجتمع غير مسئول ، مجتمع متأخر ، مجتمع مش عارف يجمعهم يحطهم فى مصحة علاج نفسى علشان يكونوا ناس صالحين يعيشوا فى مجتمع ويتعايشوا مع الناس ،،

من حقهم معاملة كويسة وإشراف طبى ، وإهتمام المسئولين ، الشرطة متعتقلهمش فى مؤسسة الأحداث لمجرد إن ملهومش

 أهل .. !! 

مؤسسة الأحداث دى مأساة ، دى مش علاج نفسى للأطفال ولا حتى مجرد حبس إحتياطى ،، دى أمراض متفشية فى قلب المجتمع العاجز عن حل مشاكله وكل إهتمامه الأوضاع السياسية وبس .. فى مواضيع كتيرة تانية مفروض مننا نلتفت ليها ومش علشان إحنا مش مسئولين يبقى معليناش أى مسئولية تجاههم بالعكس .. !

أحب أحكى قصة حصلت قبل كده .. مش مهم حصلت مع مين وفين المهم الرسالة منها !

كنت فى مرة خارجة تبع جمعية من الجمعيات الخيرية  ،  كنا بنلم تبرعات من الشوارع علشان نعالج بيها ناس فى المستشفيات مش لاقيين علاج ولا حتى لاقيين قطن وشاش علشان لما حد يتصاب يداوى إصابته ؟!

كنا بنجمع تبرعات وجمعنا كمية مش قليلة تكفى نشترى بيها شاش وقطن للمستشفيات دى 

وإحنا بنجمع التبرعات من أكتر من مكان كنت أنا بتنقل من مكان لمكان علشان أسجل جمعنا تبرعات قد إيه وخلال ما أنا ماشية من شارع لشارع تانى علشان أقلبل مجموعة تانية من زمايلى إللى بيجمعوا تبرعات 

كان فى ولد صغير شكله مبهدل أوى وعمره حوالى 9 سنين كده وبعدين لقيته ماشى ورايا !!

إستغربت أوى لأنى معرفهوش لـ درجة حتى إنى خفت منه شوية وبعدين بعد تلت ساعة من المراقبة ليا وأنا بسجل التبرعات كان الولد الصغير بيقرب منى شوية بـ شوية وبعدين قربت منه ..

قلتله مالك !؟ عايز منى إيه ؟!   ،، قال أنا عايز أقولك حاجة بس متتريقيش عليا ؟!!

قولتله قول .. ،، قالى أنتِ بتجمعى تبرعات للناس المريضة صح ،، قلتله آآه  ،، قالى طيب أنا إنهاردة مسحت علابيات فى الشارع وكسيت 6 جنيه  ،، وأنا عايز أتبرع بيهم ليكوا علشان تشتروا تعالجوا بيها الناس المريضة ،، قلتله طب والفلوس دى هتجيبها تانى إزاى ،، قالى مش مهم هشتغل تانى لحد ما أجيبهم ،، قلتله هو أنت كنت هتعمل بيهم إيه ؟!

قالى كنت هجيب ساندوتش أكله قلتله طيب أنا جيبت ليا ساندوتشات كتير وأنت طالماً سيبتها لـربنا أنا هديلك سدويتشات تكفيك تاكلهم وتشتغل تانى بكره !

قالى يا أبله هو أنت عندك أخ زى ،، قلتله لا والله أنا معنديش إخوات رجالة ,،، قالى طيب ممكن أبقى أخوكى وتسألى عليا كتيير ،، قلتله أنت بيتك فين قالى هنا ؟ قلتله هنا فيين ؟!! ،، قالى هنا تحت العربية دى وبتغطى بكرتونة !!!؟؟

كنت فى مرة فى درس اللغة العربية وبعدين الأستاذ نسى يقفل الباب ،، لقيت بنت عندها 7 سنين داخلة علينا وشكلها أكتر من مبهدل ،، شقة الدرس كلها كانت فى حالة ذعر كبير ،، وبعدين سا بتنا كلنا وراحة رايحة للأستاذ ؟!

قولتله يا أستاذ مين دى .. ؟  ،، واحدة تانية قالتله لا يا أستاذ خرجها بره ،، الأستاذ مردش علينا وراح خارج معاها وبعدين بصيت عليهم بعد ما خرجوا لقيته بيديلها فلوس و مصاصات كان محضرها فى كيس كده ؟!!

فضلت شايفة المشهد فى دماغى لغاية آخر الحصة وبعدين سألته مين دى ؟!!

قالى دى بنت كنت فى مرة ماشى  وبعين لاقيت بنت عندها يجى 22 سنة بتجرى فى الشارع والبنت دى بتجرى وراها ،، أنا رحت للبنت الصغيرة لقيتها خرصة !!  ،، وكانت عايزة تسلم على البنت الكبيرة بس هى خافت منها ومن يومها وهى بقت صاحبتى !!

قلتله : ربنا يكتر من أمثال حضرتك ويزرع الأرض بخير قلوبكم ؟!

قالى : يا هبة من لا يرحَم لا يُرحم .. !!!

9- نعم ليا رئيساً للجمهورية ..

                                                    


    بسم الله  



 أنت ،، أيوة أنت ،، مستغرب ليه ؟!
أيوة أنا عايزة أبقى رئيس الجمهورية  ،، هو رئيس الجمهورية ده عبارة عن إيه ،، مش هى كل الحكاية إنه يبقى ::

مثقف  ، مؤهل للعمل  ،،  بيحب بلده  ،، شاب لا يزيد عن 40 سنة ،،  يكون واثق فى نفسه ،، مش شرط يكون عسكرى ،، أبوه وأمه مصريين  ،،  صاحب شخصية قيادية  ،،  الأهم من كل ده إنه يكون جرب عيشة الفقراء وحس بيهم  ،، يكون بينزل يلم الزبالة الصبح  
يكون سافر قبل كده كتير  ،، يكون عاادل ،، ميقصيش حد من حياته المهنية ،، ميآخدش مواقف شخصية من حد 
والأهم بآآه أنه يكون مبهج  ،،  يعنى البسمة مرسومة على وشه على طوول  ،،  ممكن يموت فى سبيل راحة شعبه
 ورفاهية بلده  ..

أمريكا متديلهوش المام  ،،  يجيب فلوسه من تعبه وشغله  ،، ميطاطيش لإسرائيل ،، يكون روح جمال ويجمع العرب من تانى 
يكون عظمة السادات يخاف من ذكاءه العالم  ،، يكون محمد على بجبروته  ،، يكون أحمس بشجاعته ،، يكون مينا بتوحيده لصفوف شعبه ،، يكون أخناتون فى الحق والنور ،، يكون بيحب الناس مش يكرههم فى الحياة ..

لما يمشى فى الشارع ويلاقى واحد بيدور يآكل من الزبالة يبوس رأسه ويساعده ،، لما يمشى فى الشارع ويلاقى سواقين الحمير فى الشارع يجمعهم ويكلمهم عن النظافة ،، شركات التجميل والنظافة متعملش إضراب فى عهده  ،،
يعمل ندوات عن حب البلد ،، لما يلاقى مظاهرات معارضة لحكمه ينزل يمشى فيها ويتكلم مع الناس  ،، ينزل السوق يوم الخميس ويشوف طلبات الشعب ،، مؤتمرات مع المرضى وذوى الرعاية الخاصة وميهمشهمش ،، لما حد يعيا فى عهده يلاقى يتعالج على حساب الدول يبقى كل الناس يا إما غنى يا إما غنى أوى ومفيش فقراء ،، يقضى على إنتشار المخدرات فى مصر ،،

يصحى بعض الشباب إللى الدنيا خدتهم ،، يحنرم رأى إللى أكبر منه  ،،  لما يروح بره بلده ويقعد مع أى مسئول أجنبى يحط رجل على رجل فى وش أى مسئول فى العالم علشان ده ابن الفراعنة والفخر هو اسم بلده  ،، ميشحتش علينا وميحسسش الناس إنه أعلى منهم  ،، مش شرط يكون رااجل مآهو فى سيدة بمليون راجل ،، مش شرط يكون تعليمه عالى وعايش فى بلاد بره زى ما بيقولوا ،، 
يكون عادل بيحب الكل وميزعلش من إللى يسئ له ،، تكون الحرية والديمقراطية مش مجرد مصطلحات فى عهده ،،
يآخد بإيد الشرطة والجيش والقضاء يوقفهم تانى ولو يلاقى فى يوم ظلم يهد المعبد عــ الظالمين !!!


بما إنى بعشق فرقة كايروكى ،، أحب أختم بكلمات الأغنية 
#كايروكى

كايروكى - مطلوب زعيم =)) ♥

مطلوب زعيم لشعب طول عمره عظيم لشعب كان فاعل زمان لكنه هان حتى انه ثار، بإيدين كبار وإيدين صغار مفعول بيه بيقسموه ويفرقوه ويقطعوا في عين اللي جابه واللي جاب أبوه علشان يموت او ينتهي.

مطلوب زعيم لشعب حكامه خانوه وتوهوه وغيبوه واللي انتبه منه وفاق غموله عينه وكمومه وسلموه في المعتقل لكلاب جعانة يقطعوه لكنه رغم القهر قام زئر وزام وفي أسبوعين زلزل حصون الجلادين هد النظام فوق رأس جميع المفسدين.

مطلوب زعيم يحمي الحقوق يعدل ما بين الناس تمام زيّ الفاروق ويكون حنين على الفقير وعلى الفاسد يفتري يهدم علي دماغه الشقوق ويعلقوا في المشنقة او يرفعه على راس خازوق.

مطلوب زعيم ميقلش على الخواف حكيم ويكون كمان سمعه سليم يسمع لنبضة قلبنا ويكون مكانه في وسطنا ميعش أبداً في القصور والبعض منا للأسف سكانين قبور. يشرب ويأكل اكلنا ويعيش كواحد مننا يسمع لنا ويشور ويأخذ رأينا وقت الخطر نتلم حوليه كلنا ونضحي وياه بعمرنا.

مطلوب زعيم على المسؤولية يكون أمين ويكون جرئ ويكون شجاع مش امعة وحتة بتاع يعرف يقول للظلم لأ ويموت ولا يفرط في حق.

مطلوب زعيم نقدر نحاسبه بالقانون او نعزله لو للأمانة يوم يخون. لا يشترط الشكل أيه لا يشترط السن ايه لا يشترط الملة ايه شرطه الوحيد يكون بشر.
بالاختصار مطلوب " دكر".

8- أنا البحر

                                        


بسم الله ..


  أكنتِ تعلمين ،، أتسمعين هذا الهدير ،  إنها أنشودة شوق ،، من بحار العاشقين
لا تتركي البحر وحيداً ،، وأنتِ لأفـق وجدوده تملكين ،، ولأن رحلتي مع شمس الغروب
فأنت بقلبك قد رحلتي ،، وأنتِ بروحي ترحلين ،، ولأن أشرقت شمس الضحى
لاتذرفي دمعاتكِ   ،،  على قـتيلـك  ،،  ذلك البحر الحزين  ..

أحبك يا بحر !!
أتعرف لماذا ؟ .،، لأنك لست غداراً كما يرمونك به ،، أنت هادئاً ودافئاً ،، أتعرف يا بحر أنك حياتى ،، أحبك كما أحب الحياة ،، ينعتونك بالغدار وأنت تخرج لهم الأجاج و المرجان وكل ماهو كريم ومع ذلك ينعتونك بالغدار أتعرف
 لم ؟!

لأنهم هم الغدارون ،، لم يشعروا بحلاوتك وجمالك ،، لم يرتاحوا على شاطئك ،، لم يشتموا نسيمك ،، .

أتعلم أننى لا أرتاح إلا على شاطئـك والشمس تشرق فى آخرك وكأنها شعاع نور يشق نوره الماء ،، 
أأنت من يأتى إليك الآخرون ليمشوا على شاطئك الساحر ،،
أتعلم لم ؟؟

لأنك تريحهم أحياناً تكون أمواجك شديدة التلاطم لتعترض على مواقفهم وأحياناً نسيم الهواء يخيم على صوت أمواجك الغاضبة ..
لـتعلم أن غموضك أيها البحر هو سر عشق البشر لك غموضك يعظم الكون الذى أبدعه الخالق ،، فوضعك فيه ليزين الكون بك ،،
أتعلم ؟؟ أتعلم إنى لا أخاف منك ،، لأن من يحب البحر لا يعرف الخوف .. ♥

وكأن الله يأخذ منك الغدر والحقد ويضعه فى قلوب البعض ليمتحن الله قلوبهم .. أترجع إليه .. أم تعمى أبصارهم وتأخذهم الحياة فى محيط مظلم بعيدأ ... !!

7- الأراجوز

                              
 
                                                  

                                                                     الأراجوز

بسم الله الرحمن الرحيم ..

يمكن أكون أعجبت زيادة شوية بالثقافة الغربية الساخرة دى ،، ده يمكن يكون بسبب إننا شعب مبتسم بطبيعتنا أو لأننا بنحب السخرية والضحك ،، 
أنا شايفة إن دى ثقافة معبرة جداً وإنها لازم تكون منتشرة أكتر من كده شوية .. مش لإننا بنقلد الغرب أو عايزين نكون زيهم ،،
لا بالعكس لإننا إحنا إللى علمنا الغرب إزاى يضحكوا ،، إحنا شعب بن نكتة فعلاً وزى دى من الثقافات فى العالم دلوقتى بيحترموها بشدة لأنها بتوصل النقد بشكل كوميدى علشان الناس تستوعبه أكتر !!
أنا عارفة إن من كبار الساخرين فى مصر دلوقتى أصبح : باسم يوسف ،، " صاحب الإبتسامة الساحرة " 

بجد هى الناس بتحبه ليه ؟؟!  ،، حد سأل نفسه ،، طيب أنا أحب أجاوب مكانه  باسم يوسف مش كل الحكاية إنه بيعتمد على السخرية والضحك وبس لا ،، باسم شخص طبيعى جداً مش مبالغ فى تصرفاته ويمكن ده يكون قربه من الناس أكتر ،، أنا وأصحابى عن نفسنا حبيناه لأننا لقيناه قريب مننا أوى ،، مش زى الإعلاميين الكتير الموجودين دلوقتى إللى بيطبلوا للحكم يعنى معاهم معاهم عليهم عليهم ،، بالعكس باسم معبر عن حال كتير من المصريين بالإضافة إلى إنه برده دخل مجال السياسة بالصدفة زى كتير من شباب البلد ،، يمكن يكون حس بالناس أكتر ،، بالإضافة إلى إن هو بيفضح ناس كتير منافقة , 

قوة باسم تكمن فى جمهوره إللى بجد بيحبوه ،، فى التييم بتاعه إللى كلهم مع بعض علشان فى الآخر يطلعوا لنا حاجة نشوفنا مش حاجة نضحك عليها وخلاص ،، كمان باسم ناقش كتير من المواضيع المهمة فى البرنامج يمكن تكون مواضيع مش قابلة للكوميدية لكن هو عمل كده علشان توصل أسرع للناس زى مثلاً موضوع التحرش -- موضوع التمويل الخارجى للجماعات الغير شرعية -- مواضيع تخص الحرية والديمقراطية .. ممكن تكون وصلت للناس بشكل كوميدى علشان تبقى أسهل لكن مفروض إننا بجد نبص على مضمون الحلقة ..

ممكن دلوقتى ناس كتير مش تستلطفنى إنى بتكلم فى موضوع زى ده لكن أنا إلللا دفعنى إنى أتكلم إنى بجد نفسى الثقافة دى تنتشر أكتر من كده ومش لمجرد إنتشارها لا بالعكس إنتشارها علشان يكون ليها مضمون معين وتوصل رسالة معينة ،، 
أنا مش عارفة بجد إيه إللى دفعنى أكتب فى حاجة زى كده أو يمكن لأنها معبرة عنى وعن شعورى أكتر ،،

فى النهاية أحب أقول حاجة ممكن تضحكوا كلكوا عنى أنا مستنية أبقى دكتورة إن شاء الله علشان أقدم برنامج ساخر ويمكن تكون دى أمنية من أمانى أصحابى كمان لكن أنا بفرح لما ألاقى حد عنده طموح حتى لو كان طموح بسيط آآد كده
كمان أحب أوصل رسالة إننا رغم سننا الصغير هنفكر وهنكتب وهنعمل حاجات جامدة كدهون ساخرة رغم القمع والعنف إللى بيمارسوه أهالينا رفضاً لدخولنا الحياة السياسية بس أحب أقولهم الشعب إللى سبق العالم فى الحضارة والتاريخ إن شاء الله بينا هيسبقهم فى الحرية والديمقراطية ومجالات الحياة المختلفة ،، عارفين ليه لأننا إحنا الفراعـــــــــــنة  !!!

6- المرض الخبيث

                                                                                
           
                                       بسم الله
اللهم اشف كل مريض ..
                            

                                 المرض الخبيث .. ! 

وكل يوم في المدرسة .. ،، كل العيال يقولولي يا اقرع  ،،  وانا لما بسمع  ..  ساعات بضيّع  ،،  وبسدّ ودني  ..  وساعات بدمّع
وكل يوم الساعة سبعة باخد الدوا  ،،  وفاضلي جرعة يوم التلات هتفوت هوا ،، وخلاص هخفّ.. وشعري يطلع
وهسيبه يطول  ..  واحط جل  ،،  عشان العيال  ..  امّا يشوفوه .... :')   يلاقوه بيلمع .. !!

#أحمد_فرج 

مرضى المرض ده ليهم حق علينا .. إنك تزورهم .. إنك تدعيلهم .. إنك تصلى علشانهم .. إنك تتبرع باللى تقدر عليه ،، 

دى أبسط حقوقهم عليك ،، إنك متستهزأش بيهم علشان ربنا عاوزهم كده علشان يختبر أخلاقك وصبرك وتعاملك معاهم !

إنك تعمل ليهم قيمة ومكانة وتحسسهم بإنك موجود علشان تساعدهم 

إنك متتكبرش عليهم ،، متحسسهمش إنك بتمن عليهم !!

:')

وكمان من أبسط حقوقهم فى المجتمع إنه يوفر لهم العلاج المجانى ،، المستشفيات النضيفة إللى يتعالجوا فيها مش يمرضوا فيها أكتر ،، إن الدولة تستغل قدراتهم ،، إن الدولة متهمشش دورهم فى المجتمع ،، إن يوفروا لهم سبل العلاج الآمنة والمتطورة ،، 

يقدمولهم حفلات ويعملولهم أعياد مش يترموا فى مستشفى وخلاص ..

إن يسمحوا لأمه تقعد معاه مش يبقى كأنه فى السجن ،، إن الناس متبصلهوش نظرة شفقة أو إستهزاء ،، إن يفرحوهم ..

يفرحوهم بجد .. إن يسمحوا للأبحاث إللى بتطور علاج الأمراض دى إنها تتنفذ على أرض الواقع ،، عايزين بجد نساعدهم لأن المرض وحش !!

و نعمل لهم حاجة ،، 

مش نفضل نتكلم وبس .. علشان إحنا ساعات بنكون شاطرين أوووى فى الكلام وبس !!! 
يا ريت تتبرع لهم بأى حاجة إحنا فى رمضان والثواب أضعاف ..
متنساش إن الجوع أحسن بكتيير من المرض ..

5- مهما هنكبر ونعجز هفضل أحِبِك زى زمان

                                           

                                                                             
 بسم الله

                                                                      
                                        مهما هنكبر ونعجز هفضل أحِبِك زى زمان
              



  خرجت يوماً من بيتنا ومشيت فى الطريق كأى يوم من الأيام ، كان الشارع هادئاً على غير عادته وكأنه ينقصه شيئاً ما ،
يختفى منه ضجيج قلبان شائبان اعتدتُ على سماع صوتهما ، نعم !  نعم !  ، إنهم الجاران المسنان الذان يسكنان بجانبنا !
ولكن ماذا بهم ، لطالما سمعت صوت ضحكهما ، إنهما متزوجان منذ 40 عاماً من الزمان ، لم يختفى صوت ضحكهما يوماً 
طول الأربعة عقود ، تشتت ذهنى فجأة قلقاً عليهما ، كنت أطمئن قلبى ولكنى لم أصمد طويلاً فقررت أن أصعد لأزورهما وأطمئن قلبى ، دققت على باب منزلهما الذى تتوجه السعادة كل يومِ ، دققت إلى أن كادت يدى تتوقف من شدة الدق ، خرجت جارتهما صاحبة الثلاثة أولاد تقول لى : أتطلبين العجوزين ؟ ،، قلت لها نعم ، قالت لقد وقعت العجوز من على السلم ونقلت للمشفى ، 
ذهبت مسرعة إلى المشفى ودخلت إلى غرفتها وهناك كانت الصاعقة !!؟

لقد ماتت العجوز والطبيب لا يريد أن يخبر زوجها ؟! ، ويطلب منى إخباره بمثابتى جارتهم الأصغر سناً والقادرة على تخفيف آلام الرجل العجوز ،، قلت له : لا لا لا العجوز يحب زوجته ولا شك فى أنه سوف يموت قهراً إن علم بموتها !!؟

فقال لى أن العجوز يبيت قرابة 13 يوماً أمام غرفتها ويدعو الله أن يشفيها ..
وإن صارحته بالمصيبة سوف يرتاح قلبه أكثر ،، جدالاً طويلاً مع الطبيب واستقر الأمر على أن أخبره ؟!


خرجت من الغرفة لملاقاة الرجل العجوز لأفصح له عن كل شئ وكانت الدموع تنحصر بين جفنى ورموش عينى أكاد أخفيها حتى لا يراها العجوز !!
قلت له : كيف حالك يا جدى ؟؟    ،، قال لى أريد أن يأخذ الله من عمرى ويعطيها  ،، وكان الطبيب واقفاً معنا ولم يستطع التماسك وقد انهمرت عيناه دمعاً ،، !؟

لم يتفاجئ العجوز كثيراً من دموع الطبيب وهو ما كان غير متوقع !
وقال لى أ أماتت ؟؟ ،، لم أرد ..  ،، قال ثانيةً   أماتت ؟ 
قال : لا أريد رداً لقد أجاب قلبى !؟
ذهب مسرعاً خارجاً من المشفى ولم أره بعد ذلك إلا عند دفن العجوز ،، انتهينا من دفنها ودعونا لها ثم ذهبنا وفى اليوم التالى ذهبت لأزورها فى القبر وأضع لها الزهور على قبرها .. 
وكان ماحدث أن وجدت الرجل العجوز نائماً فوق قبرها وقد لفظ أنفاسه الأخيرة ،، 


ودفن العجوزان فى نفس القبر !!!

4- طـيـر الحريــة

                                  
                              
  
                                       بسم الله



الحرية طير يغدو فى السماء ، يطير ويفرح ويصبح أغلى ما فى المساء ، فالحرية شمعة تضاء ، إن انطفأت تنام

تنام فى ظلمة ليل لا نهار بعده ، فــمتى تكون الحرية فتيلاً لا يطـئه الهوان ، الإنسان لا يعرف قدر ما يملك إلا عندما يفقده ،

فهل تستطيع الفقدان فى زمن لا يعرف إلا النسيان ، ومن فقد حريته كــشمعة دون ضياء ، لا تستطيع أن تشعلها ولا أن تعيدها

 للحياة ، فاحفظها لأن الإنسان يكون قد خُدرَ من النسيان ، فلا يشعر ولا يحس ومن منا تنحنى له الأحلام ؟!
للزميلة #دينا أشرف ♥ :*

أنت حر .. يعنى حر لكن الحرية مهياش إنك تعمل مظاهرة عدائية وتروح تكسر فى ممتلكات الدولة .. مش تروح تولع فى عربيات الجيش والشرطة ،، مش تضرب ضابط أو تموت مجند ،، الحرية مش إنك تشتم فى ناس مشوفتش منهم حاجة وحشة بس لمجرد كلام سمعته ،، الحرية مش إنك تعلى صوتك عـ إللى أكبر منك لمجرد إنه مختلف معاك فى الرأى ،

الحرية مش إنك تقف مع صحابك الشباب فى الشارع لـ نص الليل تشربوا سجاير ،، الحرية مش إنك تعاكس البنات فى الشارع 
،، الحرية مش إنك تشرب سجاير وميه قدام الناس فى الشارع فى رمضان ساعة الظهرية ، مش إنك  تولع فى الزبالة فى الشارع وتخنق الناس باليل ، مش إنك تشيل الزبالة من قدام بيتك وتحطها على باب الجيران ، مش إنك لما تتخانق مع ناس فى الشارع لسبب بسيط تطلب باقى قرايبك بالسيوف والمطاوى و الخرطوش ، الحرية مش إنك تشغل أغانى فى العربية أو الموتوسيكل وتعدى من على الجامع والناس مش عارفة تصلى من صوتك ، الحرية مش إنك تكون معترض على أى حاجة فى البلد لمجرد لفت الإنتباه مش لــوعى أو دراية بالشئ إللى هتعترض عليه ،، الحرية مش إنك تآكل أو تشرب حاجة وتروح رامى الزبالة فى الشارع ،، الحرية مش إنك تكسر إشارة المرور ولما الظابط يجى يقولك تقوله وإنت مالك ؟!!

الحرية مهياش إنك تكب ميه فى الشارع على إلى رايح وإللى جاى ،، الحرية مش إنك تشتم ،، الحرية مش إنك تلعب كورة فى الشارع وتفرقع بمب 24 ساعة ،، مش إنك لما راجل كبير يكلمك ترد عليه أو تشتمه ، الحرية مش إنك تضرب عيل صغير فى الشارع ،، الحرية مش إنك تتريق على حد وتحرجه قدام الناس ..!

الحرية حريتك متجيش بيها عـلى حد وخلى حريتك نورك للطريق ، استخدمها صح علشان ربنا ميخدهااش منك دى أغلى نعمة فى الحياة ،، ومتتعداش بيها على حرية حد تانى ... :)))




أحب أختم بالكلمات دى للشاعر #أحمد مطر

يرضون بمكس الذل	ولم يعطوا مهراً للحرية
لن يرفع فرعون رأساً	إن كانت بالشعب بقية
فجيوش الطاغوت الكبرى	في وأد وقتل الحرية
من صنع شعوب غافلة	سمحت ببروز الهمجية
حادت عن منهج خالقها	لمناهج حكم وضعية
واتبعت شرعة إبليس	فكساها ذلاً ودنية
فقوى الطاغوت يساويها	وجل تحيا فيه رعية
لن يجمع في قلب أبداً	إيمان مع جبن طوية